رضا اللہ کی طوفانی بیٹنگ، انگلینڈ کے خلاف پاکستان نے میچ میں نئی جان ڈال دی
برمنگھم: انگلینڈ کے خلاف تیسرے اور آخری ٹیسٹ میں پاکستان نے شاندار مزاحمت کرتے ہوئے انگلینڈ کو فوری فتح سے روک دیا، جبکہ ڈیبیو کرنے والے فاسٹ بولر رضا اللہ خان نے اپنی دھواں دار بیٹنگ سے شائقین کو حیران کردیا۔
پاکستان نے اپنی دوسری اننگز میں 449 رنز بنائے اور انگلینڈ کو جیت کے لیے 130 رنز کا ہدف دیا۔ پاکستان کی اننگز میں رضا اللہ خان نے نویں نمبر پر بیٹنگ کرتے ہوئے صرف 73 گیندوں پر 81 رنز کی جارحانہ اننگز کھیلی، جس میں 9 چھکے شامل تھے۔ ان کی شاندار بیٹنگ نے ایجبسٹن کے میدان میں موجود شائقین کو بھی پرجوش کردیا۔
رضا اللہ نے محمد عباس کے ساتھ مل کر نچلے نمبرز پر اہم شراکت قائم کی اور اس وقت پاکستان کو سہارا دیا جب ٹیم مشکلات کا شکار تھی۔ محمد عباس نے بھی 42 رنز کی اہم اننگز کھیلی۔
اس سے قبل شان مسعود 95، بابر اعظم 76 اور اذان اویس 59 رنز کے ساتھ نمایاں رہے۔ پاکستان کی اس مزاحمت کے باعث انگلینڈ کو تیسرے دن ہی میچ ختم کرنے کا موقع نہ مل سکا اور اب اسے فتح کے لیے 130 رنز درکار ہیں۔
رضا اللہ خان کی ڈیبیو پر شاندار کارکردگی کو سوشل میڈیا پر بھی خاصی پذیرائی مل رہی ہے اور ان کی جارحانہ بیٹنگ کو پاکستان کرکٹ کے لیے ایک مثبت علامت قرار دیا جا رہا ہے۔
واضح رہے کہ انگلینڈ تین میچوں کی ٹیسٹ سیریز کے پہلے دونوں میچ جیت چکا ہے، جبکہ پاکستان کی نظریں آخری ٹیسٹ میں سیریز کا وائٹ واش روکنے پر ہیں۔
