آج کے دور میں سب سے سستا لفظ اگر کوئی ہے تو وہ ہے “اخلاص”، اور سب سے مہنگی چیز اگر کوئی بچی ہے تو وہ ہے “وفاداری

منافقت کے سائے میں دوستی کا زوال ،
تحریر: راجہ عطاء اللہ ملاگر
آج کے دور میں سب سے سستا لفظ اگر کوئی ہے تو وہ ہے “اخلاص”، اور سب سے مہنگی چیز اگر کوئی بچی ہے تو وہ ہے “وفاداری”۔ ہم ایسے معاشرے میں سانس لے رہے ہیں جہاں چہروں پر مسکراہٹیں ہوتی ہیں، مگر دلوں میں حساب کتاب چل رہا ہوتا ہے۔ منافقت اب صرف ایک اخلاقی کمزوری نہیں رہی، بلکہ کئی لوگوں کے لیے کامیابی کی سیڑھی بن چکی ہے۔افسوس کی بات یہ ہے کہ یہ رویہ صرف سیاست یا بڑے اداروں تک محدود نہیں، بلکہ ہماری ذاتی زندگیوں، دوستیوں اور رشتوں تک بھی پھیل چکا ہے۔ میں نے ہمیشہ یہ سمجھا کہ دوستی ایک ایسا رشتہ ہے جس میں حساب نہیں رکھا جاتا، جہاں ساتھ دینے کے لیے شرط یا فائدہ نہیں مانگا جاتا۔ مگر زندگی نے یہ سبق بھی سکھایا کہ ہر وہ شخص جو آپ کے ساتھ بیٹھتا ہے، ضروری نہیں کہ وہ آپ کے ساتھ کھڑا بھی رہے۔میرے اپنے تجربات نے مجھے منافقت کا اصل چہرہ دکھایا، خاص طور پر تین دوستوں کے ذریعے جنہیں میں نے ہمیشہ اپنا سمجھا۔ میں نے ہر مشکل موڑ پر ان کا ساتھ دیا: کام میں مدد دی، کسی کے سامنے کھڑے ہونے کے لیے سہارا بنایا، اور حالات خراب ہونے پر اپنے وسائل اور وقت دونوں ان پر لگا دیے۔ مجھے لگا یہی دوستی ہے، یہی انسانیت ہے۔
مگر وقت نے ثابت کیا کہ بعض لوگ آپ کے ساتھ صرف اس وقت تک ہوتے ہیں جب تک انہیں آپ سے فائدہ مل رہا ہو۔ پہلا دوست جو ہر محفل میں مجھے اپنا بھائی کہتا تھا، میری ضرورت کے وقت خاموش رہا۔ دوسرا دوست جو ہر کامیابی میں میرے ساتھ تصویر بنوانا چاہتا تھا، میرے خلاف باتیں ہوتے ہی سب سے آگے کھڑا ہو گیا۔ اور تیسرا دوست جسے میں نے اپنے رازوں تک میں شریک کیا، انہی باتوں کو دوسروں کے سامنے ہتھیار بنا لیا۔ یہ صرف ذاتی کہانی نہیں، بلکہ ہمارے معاشرے کی ایک بڑی سچائی ہے۔منافقت کی سب سے خطرناک بات یہ ہے کہ یہ اعتماد کو آہستہ آہستہ ختم کر دیتی ہے۔ انسان دوسروں پر شک کرنے لگتا ہے، ہر مسکراہٹ میں مطلب ڈھونڈنے لگتا ہے۔ یہی وجہ ہے کہ آج کئی لوگ تنہائی کو ترجیح دیتے ہیں کیونکہ جھوٹے رشتوں سے تھکن محسوس ہوتی ہے۔ سوال یہ نہیں کہ منافق لوگ کیوں ہیں، بلکہ یہ ہے کہ ہم کب تک ان چہروں کو پہچاننے سے انکار کرتے رہیں گے؟ یہ بھی حقیقت ہے کہ ہر شخص کامل نہیں ہوتا، اور ہم سب سے غلطیاں ہوتی ہیں۔ مگر غلطی اور منافقت میں فرق ہوتا ہے۔ غلطی میں ندامت ہوتی ہے، جبکہ منافقت میں منصوبہ بندی۔ غلطی میں انسان سچ بولنے کی ہمت رکھتا ہے، جبکہ منافقت میں انسان سچ سے بھاگتا ہے۔ ہمیں معاشرے میں یہ فرق سمجھنا ہوگا تاکہ ہم رشتوں کی اصل بنیاد کو بچا سکیں۔
میرا مقصد کسی کی کردار کشی کرنا نہیں، بلکہ ایک حقیقت کی طرف توجہ دلانا ہے۔ اگر ہم واقعی ایک بہتر معاشرہ چاہتے ہیں، تو ہمیں دوستی، وفاداری اور سچائی کو صرف الفاظ نہیں بلکہ عمل بنانا ہوگا۔ کیونکہ آخر میں انسان کی پہچان اس کے وعدوں سے نہیں بلکہ اس کے رویوں سے ہوتی ہے۔زندگی کا سب سے بڑا سبق یہی ہے کہ ہر ساتھ دینے والا دوست نہیں ہوتا، اور ہر مسکراہٹ خلوص کی علامت نہیں ہوتی۔ مگر اس کا مطلب یہ نہیں کہ ہم اچھائی پر یقین چھوڑ دیں۔ سچ اور وفاداری کبھی ہار نہیں سکتے، چاہے وقتی طور پر منافقت کتنی ہی مضبوط کیوں نہ دکھائی دے۔