پاکستان انڈر 19 ٹیم دورۂ انگلینڈ کے لیے لاہور سے روانہ
لاہور: پاکستان انڈر 19 کرکٹ ٹیم دورۂ انگلینڈ کے لیے آج لاہور سے روانہ ہوگئی۔ قومی جونیئر ٹیم براستہ دبئی انگلینڈ پہنچے گی، جہاں وہ میزبان انگلینڈ انڈر 19 کے خلاف ایک یوتھ ٹیسٹ اور چار یوتھ ون ڈے میچز پر مشتمل سیریز کھیلے گی۔
پاکستان انڈر 19 ٹیم کی قیادت فرحان یوسف کریں گے۔ ٹیم نے دورے سے قبل لاہور کی نیشنل کرکٹ اکیڈمی میں تربیتی کیمپ میں شرکت کی، جبکہ تیاریوں کے سلسلے میں دو روزہ ریڈ بال انٹرا اسکواڈ میچ بھی کھیلا گیا۔
دورے کا واحد یوتھ ٹیسٹ 2 سے 5 ستمبر تک ارونڈل کاسل کرکٹ گراؤنڈ میں کھیلا جائے گا۔
اس کے بعد چار میچز پر مشتمل یوتھ ون ڈے سیریز کا آغاز ہوگا۔ پہلا ون ڈے 9 ستمبر کو ارونڈل، دوسرا 12 ستمبر کو گلڈ فورڈ، تیسرا 14 ستمبر کو ورمزلے جبکہ چوتھا اور آخری ون ڈے 16 ستمبر کو ورمزلے میں کھیلا جائے گا۔
پاکستان انڈر 19 اسکواڈ میں 15 کھلاڑی شامل ہیں، جبکہ فرحان یوسف کی قیادت میں نوجوان کھلاڑی انگلش کنڈیشنز میں اپنی صلاحیتوں کے اظہار کے ساتھ ساتھ مستقبل کی قومی ٹیم کے لیے اپنی جگہ مضبوط بنانے کی کوشش کریں گے۔
یہ دورہ پاکستانی نوجوان کھلاڑیوں کے لیے ریڈ بال اور وائٹ بال دونوں فارمیٹس میں تجربہ حاصل کرنے کا اہم موقع قرار دیا جا رہا ہے۔
